بوابة الثانوية العامة المصرية - قسم خاص بالاستفسارات و الطلبات

أولاً احب ارحب بكل الناس وكل الطلبة واخص بالذكر طلبة سنة اولي دفعة 2009/2010 (المستجدين)

واحب اقولهم الف مبروك لالتحاقكوا بكلية التجارة اللي هيا من اشهر الكليات على مستوى مصر من حيث الكثافة وفرص الشغل

طبعا فيه حوالى 18 كلية تجارة على مستوى 18 جامعة في مصر تقريبا فى جميع المحافظات من شمال مصر لجنوبها ومن شرقها لغربها

يمكن كلية التجارة بالذات هيا اللي بتتميز بان فيها انتظام وانتساب وفيها عربي وانجليش وفرنساوى

طبعا فيه اسئلة كتيرة جدا هاتواجهكوا بالذات في حكاية التقديم والتنسيق وكدا .. انا ان شاء الله في الموضوع دا هحاول بقدر الامكان اني اجمعلكوا الاسئلة البديهية اللي بتتسأل عشان اجاوب عليها ويكون عندكوا علم بيها

1- واحد هايقولي انتا قولت 18 جامعة في مصر .. ايه هما الجامعات دول ؟
الـ 18 جامعة دول مجرد جامعات حكومية فقط .. اي تابعة مباشرة للاشراف الحكومى والتمويل من الحكومة وكل حاجة بتبقي تابعة للحكومة .. اشهرهم (القاهرة/اسكندرية/عين شمس/حلوان/المنصورة/بنى سويف .. الخ)

2- يعني ايه انتساب موجه ويعني ايه انتظام ؟
فيه اوجه اختلاف مابين انتظام وانتساب زي :
أ- انتظام مصاريفها اقل من انتساب
ب- انتظام بيبقالهم حاجة اسمها سكاشن لكن انتساب مالهومش
ج- امتحانات انتساب اسهل بكتير من امتحانات انتظام
د- عدد انتساب اقل من عدد انتظام (بس الناس مابتلاحظش الحكاية دي)

3- ازاي اقدم في تجارة ؟
اما نتيجة التنسيق بتاعتك بتظهر بتروح شئون الطلبة بتاعة كليتك (يعني لو عربي تروح شئون عربي ، لو انجليزي تروح شئون انجليزي .. وهكذا) وبتاخد معاك الاتى :
أ- اصل شهادة الثانوية العامة (عشان مالهاش مستخرج رسمي)
ب- بطاقة التنسيق بتاعتك
ج- حوالي 6 صور (وتكتب اسمك وراهم عشان الصور ماتضيعش وسط الزحمة)
د- استمارة 2 جند للطلبة مش الطالبات (وغالباً هايرجعهالك تاني بس هاتها احتياطى وخلاص بـ 50 قرش من اي مكتب بريد)
بعد مابتاخد الحاجات دي بتحطها في ظرف بلاستيك من ابو كبسولة دا (ولازم يبقي بكبسولة وماتسألنيش ليه!) وتقدمه للراجل اللي قاعد في الشئون .. بعد مابيتأكد من بياناتك ويطابق اسمك اللي في بطاقة الترشيح بالاسم الموجود عنده في الكشوفات اللي جايه من مكتب التنسيق مباشرة بيقوم مديك بطاقة الترشيح تاني ويقولك معا السلامة خلاص كدا ورقك خلص والف مبروك

4- السؤال المهم بقي اللي بيتكرر كتير جدااااا - ازاي اخش تجارة انجليش ؟
اما التنسيق بيتفتح (مرحلة اولي طبعا) حضرتك بتكتب في الرغبات بتاعتك تجارة كذا .. يعني مثلا تجارة القاهرة / تجارة عين شمس .. المهم انها تكون انتظام وبس .. بعد مابتجيلك نتيجة التنسيق بتتبع الخطوات السابقة في السؤال رقم 3 بالظبط .. بس الفرق ان كل اللي بيحصل انك بتروح بقي لشئون الطلبة بتوع انجليش وتقولهم انا عايز اسحب ملف شعبة .. دا بـ 100 جنيه .. طبعا انتا مش هاتديله الـ 100 جنيه وش كدا .. هوا هايديك اذن دفع تروح تدفعه في خزنة الكلية والراجل بتاع الخزنة هايديك وصل .. هاتاخده وتديه لنفس الراجل بتاع الشئون هايقوم مديك الملف .. هاتملاه وتظبط حالك وتستني اما التنسيق الداخلى بتاع تجارة انجليش يظهر .. وساعتها نقولك الف مبروك

5- هل فيه شروط معينة عشان اخش تجارة انجليش ؟
اكيد طبعا فيه .. هيا سداح مداح كدا ؟! .. الشروط واضحة زي الشمس عشان ماحدش ييجي يناقشنى فيها تاني
أ- مجموع الثانوية العامة يكون مجموع انتظام (يعني كلمة انتساب موجه دي ماشوفهاش خالص)
ب- مجموع مادة الانجليش لا تقل عن 40 من 50 (80% من المجموع الكلي للمادة)

6- انا سمعت ان فيه حاجة اسمها المجموع الاعتبارى والتنسيق الداخلى .. ايه وجع الدماغ دا ياعم ؟
لا وجع دماغ ولا حاجة .. عشان العملية ماتبقاش سداح ومداح وكل من هب ودب يخش تجارة انجليش وعشان ادارة الكلية تضمن ان الناس اللي هاتدرس في تجارة انجليش دول يكونوا قدها بيبدأوا يعملوا عملية تصفية للناس اللي متقدمة .. والتصفية دي بتبقي من خلال حاجة اسمها المجموع الاعتبارى واللي بدوره بيؤدى للتنسيق الداخلى
سامع حد دلوقتى بيقولى ان برده مافهمتش حاجة ! .. اقولك ياعم الحاج
دلوقتى المجموع الاعتبارى دا ما هو الا عبارة عن :
مجموع الثانوية العامة (بدون المستوى الرفيع) + مادة الانجليش + المستوى الرفيع في مادة الانجليش اذا وجدت
طب يعني ايه اذا وجدت دي ؟ .. يعني اذا كانت موجودة خير وبركة .. مش موجودة يبقي دا مش هايشكل مشكلة في التقديم .. بس دا بيديك ميزة على غيرك في ان الكام درجة بتوع المستوى دول بيرفعوك في مجموعك الاعتبارى
طب والتنسيق الداخلى دا ايه نظامه ؟ .. بعد ما ادارة الكلية بتستلم طلبات الطلبة في الالتحاق بتجارة انجليش بيعملوا عملية غربلة او تصفية للناس اللي متقدمة .. بحيث انهم يقبلوا عدد معين هما محددينه طبقا لكثافة الكلية .. وغالبا بيبقي 600 طالب .. وعشان كدا هما بياخدوا اعلي 600 مجموع اعتبارى متقدملهم (كمثال مش اكتر)

7- طب وتجارة فرنساوى دي ايه نظامها ؟
تجارة فرنساوى موجودة فى كلية التجارة جامعة عين شمس ومش موجودة في اي حتة تانية غيرها .. وشروط قبولها زي تجارة انجليش بس شيل انجليش وحط فرنساوى

8- هل فيه شروط معينة عشان التحق بتجارة عربى ولا هيا زيطة ؟
لا هيا زيطة والحمد لله .. لإنك اصلا اول مابتقدم انتا كدا اولريدي بتقدم في شعبة عربي .. لو عايز بقي تتخصص في انجليش او فرنساوى دا بيبقالوا كلام تاني زي ماقولنا قبل كدا

9- (لطلبة تجارة القاهرة) انا سمعت ان فيه حاجة في الكلية اسمها برنامج جورجيا .. دا ايه نظامه دا ؟
البرنامج دا عبارة عن اتفاقية تم توقيعها مابين جامعة القاهرة وجامعة جورجيا .. وبيتم قبول 30 طالب فقط

10- ايه شروط الالتحاق ببرنامج جورجيا دا ؟
بكل بساطة هيا نفس شروط الالتحاق بكلية تجارة انجليش .. بس ضيف لدا انك لازم تكون واخد شهادة التويفل في الانجليش بمجموع لا يقل عن 550 نقطة .. غير ان فيه انترفيو بيتعمل ولازم تتجاوزه وتعدي منه

11- ازاي بقدم في البرنامج دا ؟
بالظبط زي مابتقدم في تجارة عادي جدا (راجع السؤال رقم 3) .. وساعتها بقي بقول للشئون انا عايز التحق بالبرنامج دا

12- وياترى مصاريفه كام ؟
20.000 جنيه في السنة

13- (لطلبة جامعة القاهرة) وانا بقدم ملفى برده سمعت عن ان فيه حاجة اسمها قسم اكتوارى او علوم اكتوارية .. ايه القسم الغريب دا ؟
قسم علوم اكتوارية دا قسم في تجارة ومقره في مبنى تجارة انجليش .. ودا برده كان عبارة عن اتفاقية تمت مابين جامعة القاهرة وجامعة كامبردج (الانجليزية) .. بس حاليا الاتفاقية بقت تابعة لجامعة سيتى .. المهم .. القسم دا نادر وجوده في الشرق الاوسط ككل .. وهوا قسم مهم جدا جدا ومجال شغله مفتوح .. وبيتهيألي مش موجود في مصر الا في جامعة القاهرة والجامعة الامريكية

14- هل فيه شروط عشان ادخل قسم اكتوارى دا ؟
اكيد فيه شروط .. اهمهم ان التخصص فيه مش بيبقي من سنة اولى .. لا بيبقي من سنة تانية .. بس بيشترط انك :
أ- تكون جايب جيد صافي في سنة اولي (عربى او انجليش)
ب- انك تكون علمى رياضة فى الثانوية العامة
ج- فيه اختبار بيعملوه في مادة الرياضة والانجليش و لازم تعديه عشان تلتحق بالقسم دا .. والتقديم فيه بيبقي بعد ظهور النتيجة بحوالي اسبوع
د- انك تكون رايح سنة تانية .. يعني سنة اولى خلصتها خلاص على خير والسنة الجايه هاتدخل سنة تانية

13- وياترى بقى الجامعات الخاصة دي مالهاش نصيب من كليات التجارة دي ولا ايه ؟
اكيد طبعاً ليها .. وتقريبا مافيش جامعة خاصة في مصر مافيهاش كلية للتجارة وادارة الاعمال

14- طب وايه هيا بقى الجامعات الخاصة اللى فيها كليات التجارة دي ؟
جامعة 6 اكتوبر - جامعة فاروس - جامعة مصر الدولية - جامعة مصر للعلوم والاداب - الجامعة الامريكية

أظن بيتهيألي انا جمعت معظم الاسئلة اللى بتتسأل وجاوبت عليها مقدماً .. اي حد عنده استفسار تاني يقدر يتفضل ويكتب السؤال بتاعه

وكل سنة وانتوا طيبين